Ki Muhammad (SAW) Se Wafa Tu Ne To Hum Tery Hein Yeh Jahaan Chez Hai Kiya Looh o Qalam Hum Tery Hein
ā.īn-e-javāñ-mardāñ haq-goī o be-bākī
allāh ke sheroñ ko aatī nahīñ rūbāhī
aañkh jo kuchh dekhtī hai lab pe aa saktā nahīñ
mahv-e-hairat huuñ ki duniyā kyā se kyā ho jā.egī
achchhā hai dil ke saath rahe pāsbān-e-aql
lekin kabhī kabhī ise tanhā bhī chhoḌ de
agar hañgāma-hā-e-shauq se hai lā-makāñ ḳhālī
ḳhatā kis kī hai yā rab lā-makāñ terā hai yā merā
ai tā.ir-e-lāhautī us rizq se maut achchhī
jis rizq se aatī ho parvāz meñ kotāhī
amal se zindagī bantī hai jannat bhī jahannam bhī
ye ḳhākī apnī fitrat meñ na nuurī hai na naarī hai
andāz-e-bayāñ garche bahut shoḳh nahīñ hai
shāyad ki utar jaa.e tire dil meñ mirī baat
anokhī vaz.a hai saare zamāne se nirāle haiñ
ye āshiq kaun sī bastī ke yā-rab rahne vaale haiñ
apne man meñ Duub kar pā jā surāġh-e-zindagī
tū agar merā nahīñ bantā na ban apnā to ban
aql ayyār hai sau bhes badal letī hai
ishq bechāra na zāhid hai na mullā na hakīm
aql ko tanqīd se fursat nahīñ
ishq par a.amāl kī buniyād rakh
'attār' ho 'rūmī' ho 'rāzī' ho 'ġhazālī' ho
kuchh haath nahīñ aatā be-āh-e-sahar-gāhī
azāb-e-dānish-e-hāzir se bā-ḳhabar huuñ maiñ
ki maiñ is aag meñ Daalā gayā huuñ misl-e-ḳhalīl
bāġh-e-bahisht se mujhe hukm-e-safar diyā thā kyuuñ
kār-e-jahāñ darāz hai ab mirā intizār kar
bātil se dabne vaale ai āsmāñ nahīñ ham
sau baar kar chukā hai tū imtihāñ hamārā
be-ḳhatar kuud paḌā ātish-e-namrūd meñ ishq
aql hai mahv-e-tamāshā-e-lab-e-bām abhī
bharī bazm meñ raaz kī baat kah dī
baḌā be-adab huuñ sazā chāhtā huuñ
butoñ se tujh ko umīdeñ ḳhudā se naumīdī
mujhe batā to sahī aur kāfirī kyā hai
chaman-zār-e-mohabbbat meñ ḳhamoshī maut hai bulbul
yahāñ kī zindagī pābandi-e-rasm-e-fuġhāñ tak hai
DhūñDtā phirtā huuñ maiñ 'iqbāl' apne aap ko
aap hī goyā musāfir aap hī manzil huuñ maiñ
dil se jo baat nikaltī hai asar rakhtī hai
par nahīñ tāqat-e-parvāz magar rakhtī hai
dil soz se ḳhālī hai nigah paak nahīñ hai
phir is meñ ajab kyā ki tū bebāk nahīñ hai
duniyā kī mahfiloñ se uktā gayā huuñ yā rab
kyā lutf anjuman kā jab dil hī bujh gayā ho
ek sarmastī o hairat hai sarāpā tārīk
ek sarmastī o hairat hai tamām āgāhī
faqat nigāh se hotā hai faisla dil kā
na ho nigāh meñ shoḳhī to dilbarī kyā hai
firqa-bandī hai kahīñ aur kahīñ zāteñ haiñ
kyā zamāne meñ panapne kī yahī bāteñ haiñ
fitrat ko ḳhirad ke rū-ba-rū kar
tasḳhīr-e-maqām-e-rañg-o-bū kar
galā to ghoñT diyā ahl-e-madarsa ne tirā
kahāñ se aa.e sadā lā ilaah il-lallāh
gesū-e-tābdār ko aur bhī tābdār kar
hosh o ḳhirad shikār kar qalb o nazar shikār kar
ġhulāmī meñ na kaam aatī haiñ shamshīreñ na tadbīreñ
jo ho zauq-e-yaqīñ paidā to kaT jaatī haiñ zanjīreñ
gulzār-e-hast-e-būd na begāna-vār dekh
hai dekhne kī chiiz ise baar baar dekh
guzar jā aql se aage ki ye nuur
charāġh-e-rāh hai manzil nahīñ hai!
haañ dikhā de ai tasavvur phir vo sub.h o shaam tū
dauḌ pīchhe kī taraf ai gardish-e-ayyām tū
hai raam ke vajūd pe hindostāñ ko naaz
ahl-e-nazar samajhte haiñ us ko imām-e-hind
haiñ uqda-kushā ye ḳhār-e-sahrā
kam kar gila-e-barhana-pā.ī
hakīm o aarif o suufī tamām mast-e-zahūr
kise ḳhabar ki tajallī hai ain-e-mastūrī
har shai musāfir har chiiz raahī
kyā chāñd taare kyā murġh o maahī
haram-e-pāk bhī allāh bhī qur.ān bhī ek
kuchh baḌī baat thī hote jo musalmān bhī ek
havā ho aisī ki hindostāñ se ai 'iqbāl'
uḌā ke mujh ko ġhubār-e-rah-e-hijāz kare
hayā nahīñ hai zamāne kī aañkh meñ baaqī
ḳhudā kare ki javānī tirī rahe be-dāġh
hazāroñ saal nargis apnī be-nūrī pe rotī hai
baḌī mushkil se hotā hai chaman meñ dīda-var paidā
hue madfūn-e-dariyā zer-e-dariyā tairne vaale
tamāñche mauj ke khāte the jo ban kar guhar nikle
huī na aam jahāñ meñ kabhī hukūmat-e-ishq
sabab ye hai ki mohabbat zamāna-sāz nahīñ
ilm meñ bhī surūr hai lekin
ye vo jannat hai jis meñ huur nahīñ
'iqbāl' lakhna.ū se na dillī se hai ġharaz
ham to asiir haiñ ḳham-e-zulf-e-kamāl ke
ishq bhī ho hijāb meñ husn bhī ho hijāb meñ
yā to ḳhud āshkār ho yā mujhe āshkār kar
ishq tirī intihā ishq mirī intihā
tū bhī abhī nā-tamām maiñ bhī abhī nā-tamām
isī ḳhatā se itāb-e-mulūk hai mujh par
ki jāntā huuñ ma.āl-e-sikandarī kyā hai
jab ishq sikhātā hai ādāb-e-ḳhud-āgāhī
khulte haiñ ġhulāmoñ par asrār-e-shahanshāhī
jalāl-e-pādshāhī ho ki jamhūrī tamāshā ho
judā ho diiñ siyāsat se to rah jaatī hai chañgezī
jamhūriyat ik tarz-e-hukūmat hai ki jis meñ
bandoñ ko ginā karte haiñ taulā nahīñ karte
jannat kī zindagī hai jis kī fazā meñ jiinā
merā vatan vahī hai merā vatan vahī hai
jinheñ maiñ DhūñDhtā thā āsmānoñ meñ zamīnoñ meñ
vo nikle mere zulmat-ḳhāna-e-dil ke makīnoñ meñ
jis khet se dahqāñ ko mayassar nahīñ rozī
us khet ke har ḳhosha-e-gandum ko jalā do
jo maiñ sar-ba-sajdā huā kabhī to zamīñ se aane lagī sadā
tirā dil to hai sanam-āshnā tujhe kyā milegā namāz meñ
kabhī ai haqīqat-e-muntazar nazar aa libās-e-majāz meñ
ki hazāroñ sajde taḌap rahe haiñ mirī jabīn-e-niyāz meñ
kabhī chhoḌī huī manzil bhī yaad aatī hai raahī ko
khaTak sī hai jo siine meñ ġham-e-manzil na ban jaa.e
kabhī ham se kabhī ġhairoñ se shanāsā.ī hai
baat kahne kī nahīñ tū bhī to harjā.ī hai
kamāl-e-josh-e-junūñ meñ rahā maiñ garm-e-tavāf
ḳhudā kā shukr salāmat rahā haram kā ġhilāf
ḳhird-mandoñ se kyā pūchhūñ ki merī ibtidā kyā hai
ki maiñ is fikr meñ rahtā huuñ merī intihā kyā hai
ḳhudāvandā ye tere sāda-dil bande kidhar jaa.eñ
ki darveshī bhī ayyārī hai sultānī bhī ayyārī
ḳhudī ko kar buland itnā ki har taqdīr se pahle
ḳhudā bande se ḳhud pūchhe batā terī razā kyā hai
ḳhudī vo bahr hai jis kā koī kināra nahīñ
tū aabjū ise samjhā agar to chāra nahīñ
kise ḳhabar ki safīne Dubo chukī kitne
faqīh o suufī o shā.ir kī nā-ḳhush-andeshī
kushāda dast-e-karam jab vo be-niyāz kare
niyāz-mand na kyuuñ ājizī pe naaz kare
maanā ki terī diid ke qābil nahīñ huuñ maiñ
tū merā shauq dekh mirā intizār dekh
mahīne vasl ke ghaḌiyoñ kī sūrat uḌte jaate haiñ
magar ghaḌiyāñ judā.ī kī guzartī haiñ mahīnoñ meñ
maiñ nā-ḳhush-o-be-zār huuñ marmar kī siloñ se
mere liye miTTī kā haram aur banā do
maiñ tujh ko batātā huuñ taqdīr-e-umam kyā hai
shamshīr-o-sināñ avval tā.ūs-o-raubāb āḳhir
mai-ḳhāna-e-europe ke dastūr nirāle haiñ
laate haiñ surūr avval dete haiñ sharāb āḳhir
man kī daulat haath aatī hai to phir jaatī nahīñ
tan kī daulat chhāñv hai aatā hai dhan jaatā hai dhan
maqām-e-shauq tire qudsiyoñ ke bas kā nahīñ
unhīñ kā kaam hai ye jin ke hausle haiñ ziyād
masjid to banā dī shab bhar meñ īmāñ kī harārat vāloñ ne
man apnā purānā paapī hai barsoñ meñ namāzī ban na sakā
maz.hab nahīñ sikhātā aapas meñ bair rakhnā
hindī haiñ ham vatan hai hindostāñ hamārā
mīr-e-arab ko aa.ī ThanDī havā jahāñ se
merā vatan vahī hai merā vatan vahī hai
milegā manzil-e-maqsūd kā usī ko surāġh
añdherī shab meñ hai chīte kī aañkh jis kā charāġh
mire junūñ ne zamāne ko ḳhuub pahchānā
vo pairahan mujhe baḳhshā ki paara paara nahīñ
mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare
mohabbat ke liye dil DhūñDh koī TūTne vaalā
ye vo mai hai jise rakhte haiñ nāzuk ābgīnoñ meñ
motī samajh ke shān-e-karīmī ne chun liye
qatre jo the mire araq-e-infi.āl ke
mujhe rokegā tū ai nāḳhudā kyā ġharq hone se
ki jin ko Dūbnā hai Duub jaate haiñ safīnoñ meñ
murīd-e-sāda to ro ro ke ho gayā taa.ib
ḳhudā kare ki mile shaiḳh ko bhī ye taufīq
na pūchho mujh se lazzat ḳhānamāñ-barbād rahne kī
nasheman saikḌoñ maiñ ne banā kar phūñk Daale haiñ
na samjhoge to miT jāoge ai hindostāñ vaalo
tumhārī dāstāñ tak bhī na hogī dāstānoñ meñ
nahīñ hai nā-umīd 'iqbāl' apnī kisht-e-vīrāñ se
zarā nam ho to ye miTTī bahut zarḳhez hai saaqī
nahīñ is khulī fazā meñ koī gosha-e-farāġhat
ye jahāñ ajab jahāñ hai na qafas na āshiyāna
nahīñ minnat-kash-e-tāb-e-shunīdan dāstāñ merī
ḳhamoshī guftugū hai be-zabānī hai zabāñ merī
nahīñ terā nasheman qasr-e-sultānī ke gumbad par
tū shāhīñ hai baserā kar pahāḌoñ kī chaTānoñ meñ
nasha pilā ke girānā to sab ko aatā hai
mazā to tab hai ki girtoñ ko thaam le saaqī
nigāh-e-ishq dil-e-zinda kī talāsh meñ hai
shikār-e-murda sazā-vār-e-shāhbāz nahīñ
paas thā nākāmī-e-sayyād kā ai ham-safīr
varna maiñ aur uḌ ke aatā ek daane ke liye
phuul kī pattī se kaT saktā hai hiire kā jigar
mard-e-nādāñ par kalām-e-narm-o-nāzuk be-asar
purāne haiñ ye sitāre falak bhī farsūda
jahāñ vo chāhiye mujh ko ki ho abhī nau-ḳhez
rāz-e-hayāt pūchh le ḳhizr-e-ḳhajista gaam se
zinda har ek chiiz hai koshish-e-nā-tamām se
rishī ke fāqoñ se TuuTā na barhaman kā tilism
asā na ho to kalīmī hai kār-e-be-buniyād
roz-e-hisāb jab mirā pesh ho daftar-e-amal
aap bhī sharmsār ho mujh ko bhī sharmsār kar
saare jahāñ se achchhā hindostāñ hamārā
ham bulbuleñ haiñ is kī ye gulsitāñ hamārā
sabaq milā hai ye merāj-e-mustafā se mujhe
ki ālam-e-basharīyat kī zad meñ hai gardūñ
samundar se mile pyāse ko shabnam
baḳhīlī hai ye razzāqī nahīñ hai
sau sau umīdeñ bañdhtī hai ik ik nigāh par
mujh ko na aise pyaar se dekhā kare koī
saudā-garī nahīñ ye ibādat ḳhudā kī hai
ai be-ḳhabar jazā kī tamannā bhī chhoḌ de
sitāra kyā mirī taqdīr kī ḳhabar degā
vo ḳhud farāḳhi-e-aflāk meñ hai ḳhvār o zubūñ
sitāroñ se aage jahāñ aur bhī haiñ
abhī ishq ke imtihāñ aur bhī haiñ
sulatānī-e-jamhūr kā aatā hai zamāna
jo naqsh-e-kuhan tum ko nazar aa.e miTā do
tamannā dard-e-dil kī ho to kar ḳhidmat faqīroñ kī
nahīñ miltā ye gauhar bādshāhoñ ke ḳhazīnoñ meñ
terā imaam be-huzūr terī namāz be-surūr
aisī namāz se guzar aise imaam se guzar
tire āzād bandoñ kī na ye duniyā na vo duniyā
yahāñ marne kī pābandī vahāñ jiine kī pābandī
tire ishq kī intihā chāhtā huuñ
mirī sādgī dekh kyā chāhtā huuñ
tujhe kitāb se mumkin nahīñ farāġh ki tū
kitāb-ḳhvāñ hai magar sāhib-e-kitāb nahīñ
turkoñ kā jis ne dāman hīroñ se bhar diyā thā
merā vatan vahī hai merā vatan vahī hai
tū hai muhīt-e-be-karāñ maiñ huuñ zarā sī aabjū
yā mujhe ham-kanār kar yā mujhe be-kanār kar
tū ne ye kyā ġhazab kiyā mujh ko bhī faash kar diyā
maiñ hī to ek raaz thā sīna-e-kā.enāt meñ
tū qādir o aadil hai magar tere jahāñ meñ
haiñ talḳh bahut banda-e-mazdūr ke auqāt
tū shāhīñ hai parvāz hai kaam terā
tire sāmne āsmāñ aur bhī haiñ
umīd-e-hūr ne sab kuchh sikhā rakkhā hai vaa.iz ko
ye hazrat dekhne meñ sīdhe-sāde bhole-bhāle haiñ
uqābī ruuh jab bedār hotī hai javānoñ meñ
nazar aatī hai un ko apnī manzil āsmānoñ meñ
urūj-e-ādam-e-ḳhākī se anjum sahme jaate haiñ
ki ye TuuTā huā taarā mah-e-kāmil na ban jaa.e
use sub.h-e-azal inkār kī jur.at huī kyūñkar
mujhe mālūm kyā vo rāz-dāñ terā hai yā merā
uTTho mirī duniyā ke ġharīboñ ko jagā do
kāḳh-e-umārā ke dar-o-dīvār hilā do
vajūd-e-zan se hai tasvīr-e-kā.enāt meñ rañg
isī ke saaz se hai zindagī kā soz-e-darūñ
vatan kī fikr kar nādāñ musībat aane vaalī hai
tirī barbādiyoñ ke mashvare haiñ āsmānoñ meñ
vo harf-e-rāz ki mujh ko sikhā gayā hai junūñ
ḳhudā mujhe nafas-e-jabra.īl de to kahūñ
yahī zamāna-e-hāzir kī kā.enāt hai kyā
dimāġh raushan o dil tiira o nigah bebāk
yaqīñ mohkam amal paiham mohabbat fātah-e-ālam
jihād-e-zindagānī meñ haiñ ye mardoñ kī shamshīreñ
ye hai ḳhulāsa-e-ilm-e-qalandarī ki hayāt
ḳhadañg-e-jasta hai lekin kamāñ se duur nahīñ
ye jannat mubārak rahe zāhidoñ ko
ki maiñ aap kā sāmnā chāhtā huuñ
ye kā.enāt abhī nā-tamām hai shāyad
ki aa rahī hai damādam sadā-e-kun-fayakūñ
yuuñ to sayyad bhī ho mirzā bhī ho afġhān bhī ho
tum sabhī kuchh ho batāo to musalmān bhī ho
zāhir kī aañkh se na tamāshā kare koī
ho dekhnā to dīda-e-dil vā kare koī
zamām-e-kār agar mazdūr ke hāthoñ meñ ho phir kyā
tarīq-e-koh-kan meñ bhī vahī hiile haiñ parvezī
zamāna aql ko samjhā huā hai mish.al-e-rāh
kise ḳhabar ki junūñ bhī hai sāhib-e-idrāk
zamīr-e-lāla mai-e-lāl se huā labrez
ishāra paate hī suufī ne toḌ dī parhez
zindagānī kī haqīqat kohkan ke dil se pūchh
jū-e-shīr o tesha o sañg-e-girāñ hai zindagī
