Hasrat Kahe Aankhon Ki Aur Dil Kahe Mastaana | Tazmeen of Be-Khud Kiye Dete Hain Andaaz-e-Hijabana

Hasrat kahe aankhon ki aur dil kahe mastana
Deewane ki aahon ko kya theek hai tadpana!
Mushkil hua jata hai jazbaat ko samjhana
Be-khud kiye dete hain andaaz-e-hijabana
Aa dil mein tujhe rakh loon, aye jalwa-e-janana!

Chaudah sau baras pehle chhalka tha jo paimana
Baghdad mein, Kaliyar mein us ka hai nasha-khana
Kehte hain sabhi tera hai kaam kareemana
Itna to karam karna, aye nargis-e-mastana!
Jab jaan labon par ho, tum saamne aa jana

Be-bas ko yateemon ko seene se lagaya hai
Duniya ne giraya tha, Aaqa ne uthaya hai
Kehta hua ik aashiq darbar mein aaya hai
Duniya mein mujhe tum ne jab apna banaya hai
Mahshar mein bhi keh dena ye hai mera deewana

Aye yaad-e-Nabi! tera gham hans ke piye jaoon
Wo din na kabhi aaye, bin tere jiye jaoon
Har haal mein ik tera bas naam liye jaoon
Kya baat ho mahshar mein, main shikwe kiye jaoon
Wo hans ke kahe jaayein deewana hai deewana

Kuch aisi salaasat se ulfat se mile aankhein
Maghmoom mere dil ka qasid yun bane aankhein
Darbar mein Aaqa ke har haal kahein aankhein
Ji chahta hai de doon tohfe mein unhein aankhein
Darshan ka to darshan ho, nazrane ka nazrana

Bat-te hain zameen par jo sadqe hain isi dar ke
Aflaak pe roshan wo zarre hain isi dar ke
Haasil hai mujhe jo kuch rutbe hain isi dar ke
Bedam! teri qismat mein sajde hain isi dar ke
Chhuta hai na chhootega sang-e-dar-e-janana

Jis se thi khirad ‘Aajiz’ wo ‘Ishq ne kehlayi
Ye Mufti-e-Azam ne hai baat bhi samjhayi
Ki, Noor! faham walon ne is ki pazirai
Sang-e-dar-e-janaan par karta hoon jabeen-sai
Sajda na samajh, Najdi! sar deta hoon nazrana