waqt sehri ka ho gaya jaago
noor har simt chha gaya jaago
uttho sehri ki kar lo tayyari
roza rakhna hai aaj ka jaago
maah-e-ramzaan ke farz hei.n roze
ek bhi tum na chhodna jaago
utho-utho wuzu bhi kar lo aur
tum tahajjud karo 'ada jaago
chay garmaa-garam piyo uth kar
khaalo halki si kuchh giza jaago
hogi maqbool fazl-e-maula se
khaake sehri karo duaa jaago
maah-e-ramzaan ki barkatie.n looto
loot lo rahmat-e-KHuda jaago
sahri kha kar ke tum 'ada karlo
sunnat-e-shaah-e-ambiya jaago
tumko maula madina dikhlaaye
aur hajj bhi karo 'ada jaago
maah-e-ramzaan ke sadqe mei.n tumko
de KHuda 'ishq-e-mustafa jaago
sehr-o-iftaar ka madine mei.n
de sharaf tumko kibriya jaago
rehmato.n ki jadi barasti hai
jald uth kar ke lo naha jaago
tumko deedar-e-mustafa ho jaaye
hai ye 'attar ki dua jaago
